вул. Дзяржынскага, 84, 230005, г. Гродна, Беларусь
Коды: міжнародны 375 152; па Беларусі 8 (0152) 55 74 58;
тэл/факс 55 74 53
gagr@gagr.by
Міклашэвіч Сяргей Іосіфавіч
Тэл: 8 (0152) 55 74 58
панядзелак − пятніца
8.00 − 17.00,
абед 13.00 − 14.00;
панядзелак − пятніца 8.00 − 17.00,
абед 13.00 − 14.00;
апошняя пятніца месяца − санітарны дзень
Карыстальнікі дапускаюцца ў чытальную залу на падставе асабістых заяў. Карыстальнікі, якія вядуць навуковую працу ў адпаведнасці з планам навукова-даследчых работ навуковых устаноў, устаноў адукацыі і іншых устаноў або выконваюць службовае заданне, прадастаўляюць афіцыйныя лісты (адносіны) арганізацый, якія іх накіравалі.
У заявах або лістах указваюцца прозвішча, уласнае імя, імя па бацьку карыстальніка (калі такое маецца), адрас пражывання, адрас электроннай пошты (пры наяўнасці), тэма, мэта, храналагічныя рамкі даследавання. Заявы выкладаюцца на рускай або беларускай мовах.
Дазвол на працу ў чытальнай зале даецца кіраўніком архіва (яго намеснікам) на тэрмін не больш за адзін год з моманту рэгістрацыі заявы. Тэрмін працы можа быць прадоўжаны па заяве карыстальніка. У выпадку змены тэмы і храналагічных рамак даследавання карыстальнік афармляе новую заяву.
Адначасова для карыстання можа быць выдадзена 5 (пяць) вопісаў і не больш за 20 (дваццаць) спраў. Чарговы заказ на выдачу спраў прымаецца толькі пасля здачы спраў па папярэднім заказе.
Заказы на выдачу спраў, пададзеныя карыстальнікамі да 13.00, выконваюцца ў гэты ж дзень пасля 15.00. Заказы, пададзеныя пасля 13.00 – на наступны працоўны дзень.
Выдача спраў іншагароднім (замежным) карыстальнікам ажыццяўляецца на працягу гадзіны пасля афармлення заказу.
Справы або іх лічбавыя копіі выдаюцца ў чытальную залу тэрмінам на 1 (адзін) месяц, асабліва каштоўныя – 5 (пяці) рабочых дзён. Вопісы і іншыя архіўныя даведнікі выдаюцца карыстальніку на тэрмін да 5 рабочых дзён.
У выпадку адсутнасці карыстальніка на працягу 2 (двух) тыдняў падрыхтаваныя для яго матэрыялы вяртаюцца ў архівасховішча, асабліва каштоўныя – праз 5 рабочых дзён.
Выраб копій дакументаў
Па заказах карыстальнікаў у залежнасці ад тэхнічных магчымасцяў архіва і фізічнага стану дакументаў вырабляюцца копіі. Капіраванне архіўных дакументаў ажыццяўляецца па дазволу кіраўніцтва архіва на падставе пісьмовага заказу карыстальніка. Пры афармленні заказу абавязкова паказваюцца пошукавыя дадзеныя дакументаў. Капіраванне дакументаў па заказах карыстальнікаў ажыццяўляецца на платнай аснове ў адпаведнасці з дзеючым прэйскурантам архіва. Выраб копій ажыцяўляецца ў тэрмін да 10 працоўных дзён з моманту аплаты, калі аб’ём ксеракопій дакументаў ад замовы аднаго карыстальніка не перавышае 100 старонак, а аб’ём вырабу лічбавых копій дакументаў з ужываннем сканавальнага абсталявання не перавышае 50 старонак.
Капіраванне вопісаў, каталогаў, картатэк і іншых архіўных даведнікаў у поўным аб’ёме па заказах карыстальнікаў не вырабляецца.
Капіраванне архіўных дакументаў на папяровым носьбіце тэхнічнымі сродкамі карыстальнікаў, у тым ліку фотаапаратамі, тэлефонамі, планшэтнымі кампутарамі, не дазваляецца.
Рэжым працы чытальнай залы:
Панядзелак-Пятніца: 8.00-17.00, абед 13.00-14.00.
Апошняя пятніца кожнага месяца – санітарны дзень.
Субота, нядзеля: выходныя дні.
У дні дзяржаўных святаў чытальная зала не працуе, напярэдадні дзяржаўных святаў працоўны дзень чытальнай залы скарачаецца на 1 гадзіну працы.
Сваю гісторыю Дзяржаўны архіў Гродзенскай вобласці адлічвае з кастрычніка 1944 года. Абласны архіў, як і многія архівы ў тыя гады, быў размешчаны ў будынку нямецкай кірхі ў цэнтральнай частцы горада Гродна па вуліцы Акадэмічная, 7а. архівасховішчы былі абсталяваны драўлянымі стэлажамі ў тры ярусы. Першы і другі паверхі двухпавярховай прыбудовы былі прыстасаваныя пад працоўныя пакоі.
У 1993 годзе архіў пераехаў у новы спецыялізаваны сяміпавярховы
будынак па вуліцы Дзяржынскага, 84. На пяці паверхах будынка размешчаны
архівасховішчы, на першым і другім – службовыя памяшканні, чытальная зала,
лабараторыя.
Згодна з першым пашпартам, складзеным у 1944 годзе, у архіве налічвалася 20 фондаў у колькасці 11000 спраў. Многія з іх паступілі ў архіў у выглядзе россыпі. Але ўжо да чэрвеня 1946 года, калі архіў перайшоў у падпарадкаванне архіўнага аддзела ўпраўлення МУС па Гродзенскай вобласці, налічвалася 55 фондаў і 18 500 адзінак захоўвання. На 01.01.2023 у архіве маецца на захоўванні 1743 фонды і каля 570000 адзінак захоўвання пачынаючы з 1919 года і па цяперашні час.
Найбольш раннія дакументы архіва даюць уяўленне аб першых органах Савецкай улады – рэвалюцыйных камітэтах. Архіў захоўвае каштоўныя дакументы па перыядзе ўваходжання Гродзеншчыны ў склад Польшчы. Менавіта гэтаму комплексу дакументаў нанесены непапраўны ўрон у перыяд Вялікай Айчыннай вайны. Тым не менш, дакументы, якія захаваліся за 1919-1939 гады, адлюстроўваюць сацыяльна-эканамічнае развіццё рэгіёну, народную гаспадарку, адукацыю, культуру, ахову здароўя да ўз’яднання Заходняй Беларусі з БССР.
Архіў захоўвае дакументы перыяду часовай нямецка-фашысцкай акупацыі –фонды ўстаноў, арганізацый, прадпрыемстваў, якія дзейнічалі на тэрыторыі Гродзеншчыны. Амаль усе дакументы на нямецкай мове. У фондах архіва маюцца трафейныя карткі ваеннапалонных, якія знаходзіліся ў нямецкіх лагерах, медыцынскія пасведчанні грамадзян, адпраўленых на працу ў Германію, пасведчанні вязняў гета, анкеты рабочых, паведамленні аб прызыве на працу, інфармацыі аб гета і інш.
Самы вялікі масіў дакументаў архіва – гэта дакументы савецкага перыяду. Асноўную частку фондаў архіва дадзенага перыяду складаюць фонды: органаў дзяржаўнай улады і кіравання; дзяржаўнага і народнага кантролю; юстыцыі, суда і пракуратуры; фінансавання і дзяржаўнага страхавання; планавання і статыстыкі; кіравання народнай гаспадаркай, прамысловых прадпрыемстваў; устаноў і арганізацый сельскай, лясной і воднай гаспадаркі; будаўніцтва і архітэктуры; камунальнай гаспадаркі, транспарту і сувязі; гандлю, грамадскага харчавання, збыту, нарыхтоўкі і кааперацыі; народнай адукацыі, навучальных устаноў; культуры, мастацтва, масавай інфармацыі; фізкультуры і спорту; аховы здароўя, прафсаюзных і іншых грамадскіх арганізацый.
Дакументы постсавецкага перыяду прадстаўлены ў фондах устаноў, арганізацый, прадпрыемстваў, створаных у 90-я гады ХХ стагоддзя – гэта падатковыя інспекцыі, камітэт па дзяржмаёмасці, сельскагаспадарчыя вытворчыя кааператывы, адкрытыя акцыянерныя таварыствы, таксама ўстановы, арганізацыі, прадпрыемствы, якія працягваюць сваю дзейнасць у цяперашні час.
У фондах асабістага паходжання сабраны дакументы аб жыцці і дзейнасці доктара гістарычных навук, прафесара Гродзенскага дзяржаўнага ўніверсітэта імя Янкі Купалы Я.М.Мараша; філосафа, члена-карэспандэнта Акадэміі Навук СССР, ураджэнца г. Гродна А. Макавельскага; пісьменніка Аляксея Карпюка, кандыдата гістарычных навук, прафесара Гродзенскага дзяржаўнага ўніверсітэта імя Янкі Купалы В.М. Чарапіцы, прафесара Гродзенскага дзяржаўнага медыцынскага інстытута В.Ч. Брэжскага і інш. Маюцца таксама асабістыя справы пісьменніка Янкі Брыля і паэткі Дануты Бічэль, якія працавалі ў чытальнай зале архіва ў 1958-1960 гадах.
Асаблівую цікавасць уяўляе асабісты фонд дырэктара дзяржархіва Гродзенскай вобласці, заслужанага дзеяча культуры БССР А.М.Пляшавені, які нязменна кіраваў архівам больш за 30 гадоў і ўнёс значны ўклад у развіццё архіва. Фонд прадстаўлены тэкстамі лекцый, артыкуламі, тэматычнымі падборкамі дакументаў і фотакопіямі, выяўленымі ў розных музеях і архівах Рэспублікі, сцэнарамі тэле- і радыёперадач з удзелам А.М. Пляшавені. Дапаўняюць фонд карты-схемы Карпацкай, Праснышскай, Лодзинскай і інш. баявых аперацый, карта адміністрацыйнага падзелу Польшчы 1938 года, дакументы 7-га міжнароднага кангрэса архівістаў у г. Маскве, у якім прымаў удзел Аляксандр Нікіціч.
У архіве маюцца і калекцыі дакументаў. Яны захоўваюць успаміны, лісты, фатаграфіі ўдзельнікаў рэвалюцыйнага, нацыянальна-вызваленчага, партызанскага і антыфашысцкага руху; дакументы па гісторыі беларускай пагранічнай акругі, малааб’ёмных калгасаў Бераставіцкага, Васілішкаўскага, Ваўкавыскага, Гродзенскага, Жалудоцкага, Зэльвенскага, Мастоўскага, Поразаўскага, Свіслацкага, Скідзельскага, Сапоцкінскага, Шчучынскага раёнаў Гродзенскай вобласці; матэрыялы па асабовым складзе ўстаноў, арганізацый і прадпрыемстваў за 1944-1962 гады і інш.
Сёння Дзяржаўны архіў Гродзенскай вобласці – гэта сучасная ўстанова, галоўнай задачай якой з’яўляецца захаванасць гістарычнай і культурнай спадчыны раёна, папулярызацыя дакументаў. У цяперашні час архіў мае пяць аддзелаў: аддзел забеспячэння захаванасці дакументаў і фондаў, аддзел інфармацыйна-пошукавых сістэм і аўтаматызаваных архіўных тэхналогій, аддзел інфармацыі, публікацыі і выкарыстання дакументаў, аддзел справаводства і фарміравання НАФ, аддзел навукова-тэхнічнай апрацоўкі дакументаў.
Сёння архіўны працэс забяспечваюць больш за 40 чалавек, а на момант стварэння архіва ўсяго 22. На рахунку архівістаў Дзяржаўнага архіва Гродзенскай вобласці тысячы выяўленых дакументаў, сотні напісаных артыкулаў, інфармацый, дзясяткі праведзеных выстаў, тэле – і радыёперадач. Дакументы архіва запатрабаваныя шырокім колам карыстальнікаў. У іх ліку: гісторыкі, філолагі, краязнаўцы, прадстаўнікі розных арганізацый і ўстаноў, даследчыкі з краін блізкага і далёкага замежжа: Польшчы, Літвы, Ізраіля, Канады, ЗША і інш.
Архіў ўдзельнічае і ў міжнародных праектах. У 1993-1994 гадах па фондах архіва на тэму, звязаную з гісторыяй яўрэйства ў перыяды I і II Сусветных войнаў, працавалі прадстаўнікі Інстытута памяці ахвяр Катастрофы і герояў супраціву «Яд Вашэм». У 2005 годзе на адкрыцці мемарыяла забітым яўрэям Еўропы ў г. Берліне архівам быў прадстаўлены спіс вязняў Карэліцкага гета.
У 2006 годзе архіў удзельнічаў у V Нацыянальнай філатэлістычнай выставе «Белфіла-2006», арганізаванай Міністэрствам сувязі і інфарматызацыі Рэспублікі Беларусь і Гродзенскім філіялам РУП «Белпошта», і прадставіў экспазіцыю па гісторыі абарачэння паштовай карэспандэнцыі на тэрыторыі Гродзеншчыны ў перыяд 1921-1939 гадоў. Прадстаўленая архівам калекцыя атрымала высокую ацэнку журы і была ўдастоена залатога медаля. У 2012-2013 гадах архівам была праведзена вялікая праца па сканаванні дакументаў і складанні баз дадзеных савецкіх ваеннапалонных у перыяд Вялікай Айчыннай вайны ў рамках міжнароднага праекта Саксонскія мемарыялы https://ru.stsg.de/cms/dokstelle/content/o-tsentre/tsentr-dokumentatsii.
У гэтым жа годзе дырэктар архіва Л.І. Юніна прыняла ўдзел у трохбаковай сустрэчы кіраўнікоў дзяржаўных архіўных службаў і ўстаноў Украіны, Расіі і Беларусі, якая праходзіла ў г. Ужгарадзе (Украіна). У 2015 годзе архіў прыняў удзел у прафесійнай сустрэчы архівістаў Беларусі, Расіі і Казахстана.
У апошнія гады архіў робіць пэўныя крокі ў галіне публікацыйную дзейнасці. Пра гэта сведчаць выдадзеныя зборнікі дакументаў «Гродзенская вобласць у дакументах і матэрыялах (1944-1995)» (2004), «Гродзеншчына напярэдадні і ў гады Вялікай Айчыннай вайны» (2005), «Аўгустоўскі канал i яго наваколле (па дакументах Дзяржаўнага архіва Гродзенскай вобласці)» (2011), «Гродзенская праваслаўная епархія (1921-1939): дакументы і матэрыялы» (2016), «Праваслаўная царква на тэрыторыі Гродзенскай вобласці (1944-1991 гг.). Дакументы і матэрыялы» (2020), «Гродзеншчына ў ліпені-верасні 1920 г.: улада і грамадства. Дакументы і матэрыялы» (2022) і даведнік «Дзяржаўны архіў Гродзенскай вобласці (1919-2000)» (2007).
Архіў арганізуе прыём і разгляд запытаў юрыдычных ці фізічных асоб. У запыце ўказваюцца поўнае найменне юрыдычнай асобы, прозвішча, імя ўласнае, імя па бацьку (калі такое маецца) фізічнай асобы, паштовы адрас, тэма (пытанне), храналагічныя і геаграфічныя рамкі запытаных звестак.
Дзяржаўны архіў Гродзенскай вобласці выконвае наступныя віды запытаў:
сацыяльна-прававога характару (запыт аб прадастаўленні архіўнай інфармацыі, звязаны з забеспячэннем законных правоў грамадзян): аб валоданні, карыстанні і распараджэнні нерухомай маёмасцю, яе набыцці і атрыманні ў спадчыну, аб скасаванні шлюбу, аб устанаўленні апекі, аб працоўным стажы, членстве ў калгасе і прадастаўленні сацыяльных водпускаў па догляду дзіцяці, аб узнагароджаннях і прысваеннях ганаровых званняў, аб выбранні на выбарныя пасады і інш.;
тэматычныя – запыты аб прадастаўленні інфармацыі па пэўнай праблеме, тэме, падзеі або факце;
біяграфічныя – запыты, па якіх устанаўліваюцца звесткі, неабходныя для вывучэння жыцця канкрэтнай асобы, удакладнення фактаў яе біяграфіі;
генеалагічныя – запыты аб архіўнай інфармацыі, з дапамогай якой можна ўсталяваць роднасныя сувязі двух або больш асоб.
Запыты тэматычнага, біяграфічнага і генеалагічнага характару выконваюцца ў парадку аказання архівам платных паслуг на дагаворнай аснове. Кошт выканання запытаў вызначаецца ў адпаведнасці з Прэйскурантам на работы (паслугі), якія выконваюцца ўстановай “Дзяржаўны архіў Гродзенскай вобласці”. Праца аплачваецца ў выпадку як станоўчага, так і адмоўнага выніку пошуку.
Тэрміны выканання запытаў складаюць:
сацыяльна-прававога характару – на працягу 15 каляндарных дзён з дня падачы заявы, а пры неабходнасці дадатковага вывучэння і праверкі – на працягу 1 месяца;
тэматычных, біяграфічных праверкі – на працягу 1 месяца;
генеалагічных запытаў праверкі – на працягу 3 месяцаў.
Пры неабходнасці правядзення пошуку па значнай колькасці архіўных дакументаў тэрмін выканання можа быць падоўжаны.
Па выніках разгляду запытаў архівам рыхтуюцца: архіўная даведка, архіўная копія, архіўная выпіска, інфармацыйны ліст.
Пісьмовыя і электронныя пытанні разглядаюцца супрацоўнікамі па меры іх паступлення, у парадку чаргі. У працэсе выкрыцця неабходных дадзеных архіваў можа накіроўваць ім паведамленне аб неабходных удакладненнях ён ці іншай інфармацыі.
Запісы актаў грамадзянскага стану (нараджэнне, смерць, заключэнне шлюбу, скасаванне шлюбу і інш.), складзеныя аддзеламі запісу актаў грамадзянскага стану мясцовых выканаўчых і распарадчых органаў горада Гродна і Гродзенскай абласці, за перыяд з 1945 года па цяперашні час знаходзіліся на захоўванні ў аддзеле па пытаннях справаводства, архівах, у тым ліку загса Галоўнага ўпраўлення юстыцыі Гродзенскага аблвыканкама па адрасе: г. Гродна, вул. Сацыялістычная, 35; тэл. 8 (0152) 61-00-47, 8 (0152) 55-90-88.
Часткова захаваныя метрычныя запісы аб нараджэнні, шлюбе, смерці, якія вяліся да 1944 года культавымі ўстановамі (касцёлы, цэрквы, сінагогі і іншыя) захоўваюцца ў дзяржаўнай ўстанове “Нацыянальны гістарычны архіў Беларусі ў г. Гродна”: г. Гродна, вул. Гаспадарчая, 21; тэл. 8 (0152) 60-83-92; электронная пошта: niab@niab-grodno.by.
Увазе плацельшчыкаў
Аплата за выкананую работу (аказаную паслугу) праводзіцца толькі пасля заключэння дагавора, і (або) акта выкананых работ (паслуг).
Заказчыкамі платных работ і паслуг могуць выступаць дзяржаўныя органы, юрыдычныя асобы незалежна ад форм уласнасці, а таксама фізічныя асобы, у тым ліку замежныя грамадзяне.
Фарміраванне тарыфаў на платныя работы і паслугі здзяйсняецца ў адпаведнасці з заканадаўствам. Тарыфы на платныя работы і паслугі зацвярджаюцца кіраўніком дзяржаўнай архіўнай установы.
Аплата за выкананыя работы (аказаныя паслугі) праводзіцца на пазабюджэтны разліковы рахунак архіва:
Установа «Дзяржаўны архіў Гродзенскай вобласці» 230005 г. Гродна, вул. Дзяржынскага, 84 УНП 500044112
р/с BY09АКВВ36320000007494000000 Гродзенскае абласное ўпраўленне № 400 ОАО «АСБ Беларусбанк», БІК АКВВВY2X г. Гродна, вул. Новакастрычніская, 5
Аплата за выкананую работу або аказаную паслугу праводзіцца на ўмовах і ў парадку, прадугледжаных дагаворам. Разавыя платныя работы і паслугі, якія выконваюцца (аказваюцца) пры ажыццяўленні здзелкі, могуць аплачвацца заказчыкам пасля выканання работы або аказання паслугі без заключэння пісьмовага дагавора. Для выканання шматразовых работ і паслуг, якія патрабуюць працяглага тэрміну выканання, паміж заказчыкам і выканаўцам заключаецца пісьмовая дамова, адзін экзэмпляр якога застаецца ў архіве, іншы – перадаецца замоўцу.
ІНФАРМАЦЫЯ ДЛЯ ПЛАЦЕЛЬШЧЫКАЎ, ЯКІЯ ПРАЖЫВАЮЦЬ ЗА МЕЖАМІ РЭСПУБЛІКІ БЕЛАРУСЬ
Тэлефоны для даведак:
8(0152) 55-74-57 (Аддзел інфармацыі, публікацыі і выкарыстання дакументаў)
8(0152) 55-74-52 (Бухгалтэрыя)
Аплата за выкананую работу або аказаную паслугу ажыццяўляецца на ўмовах і ў парадку, прадугледжаных дагаворам.
Рэквізіты для аплаты:
Установа «Дзяржаўны архіў Гродзенскай вобласці»
УНП 500044112, 230005 г. Гродно вул. Дзяржынскага, 84
«Gosudarstvenniy arhiv Grodnenskoy oblasty», Grodno, ul.Dzerzhinskogo, 84
р/сч BY09AKBB36320000007494000000(BYN)
р/сч BY98AKBB36320000008534000000(USD)
р/сч BY79AKBB36325010016384000000(EUR)
у Гродзенскім абласным упраўленні №400 ОАО «АСБ Беларусбанк» г. Гродно, РБ
SWIFT/ БІК AKBBBY2X
Belarusbank SWIFT/BIC: AKBBBY2X
Payer’s Identification Number: UNP 100325912
Колькасць фондаў: 1743
10 калекцый
569 601 адзінак захоўвання
Храналагічны перыяд: з 1919 г. па цяперашні час
Тэрытарыяльны ахоп:
Заходняя Беларусь у складзе Польшчы (асобныя тэрыторыі)
скасаваныя Васілішкаўскі, Жалудокскі, Поразаўскі, Скідзельскі, Сапоцкінскі раёны
горад Гродна, Бераставіцкі, Ваўкавыскі, Гродзенскі, Зэльвенскі, Мастоўскі, Свіслацкі і Шчучынскі раёны Гродзенскай вобласці
Склад фондаў:
Самыя раннія дакументы архіва адносяцца да перыяду існавання на Гродзеншчыне першых органаў Савецкай улады – ваенна-рэвалюцыйных камітэтаў (1920 г.). Гэта дакументы аб арганізацыі партыйных і камсамольскіх ячэек; загады, распараджэнні і пратаколы пасяджэнняў павятовых і валасных рэвкамаў па ўсіх напрамках палітычнай, эканамічнай і грамадскай дзейнасці; спісы валасцей і населеных пунктаў і звесткі аб колькасці ўрочышчаў, маёнткаў, фальваркаў і колькасці жыхароў у іх; матэрыялы аб рабоце Гродзенскага тэатра і інш.
У архіве захоўваецца значны комплекс дакументаў устаноў Польскай Рэспублікі, якія існавалі на тэрыторыі Навагрудскага ваяводства (акрамя Баранавіцкага і Валожынскага паветаў), Ваўкавыскага і Гродзенскага паветаў Беластоцкага ваяводства. Эканамічны стан краю, правядзенне аграрнай рэформы, хутарызацыя сялянскіх гаспадарак, падатковая палітыка асветлены ў фондах Навагрудскага ваяводскага ўпраўлення, павятовых старостваў, праўленняў, гмінных рад, зямельных упраўленняў і надлесніцтваў.
Фонды настаўніцкіх семінарый, гімназій змяшчаюць загады, цыркуляры і распараджэнні Міністэрства рэлігійных культаў і грамадскай асветы, папячыцельстваў Варшаўскай і Віленскай навучальных акруг, пратаколы пасяджэнняў педагагічных саветаў і дзяржаўных экзаменаў, спісы выкладчыкаў і навучэнцаў, ведамасці паспяховасці і інш.
У справаздачах, данясеннях, судовых справах паліцэйскіх судовых устаноў, Гарадзенскай турмы ўтрымліваюцца звесткі пра грамадзка-палітычны рух і выступы працоўных у 1935-1936 гг. у абарону рэвалюцыянера С. А. Прытыцкага, прысуджанага польскім судом да смяротнага пакарання; аб утрыманні ў Гродзенскай турме паэтаў М. Машары, Ф. Пестрака, В. Таўлая. Дакументы фондаў устаноў перыяду буржуазнай Польскай Рэспублікі ў асноўным на польскай мове.
Дакументы перыяду нямецка-фашысцкай акупацыі прадстаўлены фондамі ўстаноў, арганізацый і прадпрыемстваў, якія дзейнічалі ў той час на акупаванай тэрыторыі, і ілюструюць палітыку нямецкіх улад.
Самы вялікі масіў дакументаў архіва – гэта дакументы савецкага перыяду. Дакументы 1939-1941 гг. адлюстроўваюць гісторыю ўз’яднання Заходняй Беларусі з Беларускай Савецкай Сацыялістычнай Рэспублікай (БССР), сацыялістычных пераўтварэнняў эканомікі і культуры напярэдадні вайны. Асноўную частку фондаў архіва пасляваеннага перыяду складаюць фонды органаў дзяржаўнай улады і кіравання, дзяржаўнага і народнага кантролю, юстыцыі, суда і пракуратуры, планавання і статыстыкі, фінансавання, дзяржаўнага страхавання; устаноў і арганізацый сельскай, лясной і воднай гаспадаркі, будаўніцтва і архітэктуры, камунальнай гаспадаркі, транспарту і сувязі, гандлю, грамадскага харчавання, кааперацыі, народнай адукацыі, культуры, мастацтва, сродкаў масавай інфармацыі, аховы здароўя, сацазабеспячэння, фізкультуры і спорту, прафсаюзных і іншых грамадскіх арганізацый. Гэтыя фонды змяшчаюць дакументы, якія адлюстроўваюць асноўную дзейнасць, функцыі названых устаноў, арганізацый і прадпрыемстваў.
Дакументы ўстаноў, арганізацый і прадпрыемстваў, створаных у 90-я гг. XX ст., прадстаўлены ў фондах падатковых інспекцый, камітэта па дзяржмаёмасці, адкрытых акцыянерных таварыстваў, сельскагаспадарчых вытворчых кааператываў.
У фондах асабістага паходжання архіва сабраны дакументы аб жыцці і дзейнасці доктара гістарычных навук, прафесара Гродзенскага дзяржаўнага ўніверсітэта імя Янкі Купалы Я. Н. Мараша; філосафа, члена-карэспандэнта Акадэміі навук СССР, ураджэнца г. Гродна А. А. Макавельскага; пісьменніка А. Карпюка; дырэктара Дзяржаўнага архіва Гродзенскай вобласці, заслужанага дзеяча культуры БССР А. М. Плешавені; доктара медыцынскіх навук, прафесара В.У. Бржэскага, дырэктара Нацыянальнага гістарычнага архіва ў г. Гродне, заслужанага работніка культуры БССР, гісторыка-архівіста К.П. Батраковай; кандыдатаў гістарычных навук, прафесараў Гродзенскага дзяржаўнага ўніверсітэта імя Янкі Купалы І.І. Коўкеля, В.М. Чарапіцы, ветэрана Вялікай Айчыннай вайны, ганаровага грамадзяніна горада Гродна Г.І. Абялеўскага.
У архіве ёсць калекцыі дакументаў удзельнікаў Вялікай Кастрычніцкай сацыялістычнай рэвалюцыі, грамадзянскай вайны, рэвалюцыйнага руху на Гродзеншчыне і партызанскага руху ў гады Вялікай Айчыннай вайны; дакументаў на рэпатрыяваных грамадзянскіх асоб і савецкіх ваеннапалонных, дакументаў фільтрацыйных спраў грамадзян, якія вярнуліся з Германіі; дакументаў па асабовым складзе за 1944-1962 гг.; дакументаў па гісторыі Беларускай пагранічнай акругі, сабраных У.П.Верхасем; калекцыя лічбавых копій на правах арыгіналаў дакументаў Надзвычайнай дзяржаўнай камісіі па ўстанаўленні і расследаванні злачынстваў нямецка-фашысцкіх захопнікаў і іх саўдзельнікаў і прычыненага імі ўрону грамадзянам, калектыўным гаспадаркам (калгасам), грамадскім арганізацыям, дзяржаўным прадпрыемствам і ўстановам СССР (ЧДК) па г. Гродна. Бераставіцкаму Васілішкаўскаму, Ваўкавыскаму, Гродзенскаму, Зэльвенскаму, Мастоўскаму, Поразаўскаму, Радунскаму, Свіслацкаму, Скідзельскаму, Сапоцкінскаму, Шчучынскаму раёнам Гродзенскай вобласці БССР, перададзеных з Дзяржаўнага архіва Расійскай Федэрацыі.
14 лютага 2023 года прайшла рабочая сустрэча старшыні Гродзенскай абласной арганізацыі Беларускага прафсаюза работнікаў дзяржаўных і іншых устаноў Алены Пятроўны Берасневай з прафсаюзным актывам і наймальнікам Дзяржаўнага архіва Гродзенскай вобласці. На сустрэчы абмеркавалі актуальныя пытанні арганізацыі сумеснай работы прафкама і архіва, а таксама пытанні інфармацыйнага ўдзелу прафкама ў сучасных умовах, праграмы аздараўлення і інш.
У рамках рэалізацыі праекта «Гарады Беларусі», прымеркаванага да Года міру і стварэння, ў установе «Дзяржаўны архіў Гродзенскай вобласці» адкрылася выстава «Родны мой горад, любоў мая…». Прадстаўленыя на выставе фатаграфіі славутасцяў і вуліц горада дазваляюць акунуцца ў атмасферу старога Гродна другой паловы 20-га стагоддзя.
Для стварэння экспазіцыі былі выкарыстаны фотаматэрыялы з архіўных фондаў асабістага паходжання кандыдата гістарычных навук В.М.Чарапіцы, заслужанага ўрача БССР Ф.А.Багдановіча, а таксама фотаматэрыялы з архіўнага фонду «Гродзенскае абласное аддзяленне добраахвотнага таварыства аховы помнікаў гісторыі і культуры БССР».
Напярэдадні Каляд і Новага года прафсаюзны камітэт Дзяржаўнага архіва Гродзенскай вобласці на чале са старшынёй А. М. Чарняк павіншаваў індывідуальна кожнага супрацоўніка установы з надыходзячымі святамі і ўручыў салодкія падарункі. Прагучалі цёплыя пажаданні моцнага здароўя, матэрыяльнага дабрабыту, поспехаў у працы і добрага настрою.
